賭波的人可能是足球白癡

曾經提出過質疑，賭波的人可能是足球白癡。

感謝無線的《新聞透視》，替我這個假設作了驗證。
記者在投注站外，隨意找幾個落完「波纜」的市民，詢問他們的足球知識。

「窩利抽射？唔識喎。」
「痾蛋？即係．．．捧蛋！一定係咁。」
「越位陷阱？即係．．．傳球那時．．．站在越位位置囉．．．」
「足球幾多人踢？12個．．．10個（記者：係11個）哦，計埋龍門咪12個囉！」

記者拿著捷克國家隊球衣，考一考茶餐廳內「球迷」。

「唔．．．有隻鷹（捷克隊徽）．．．應該係非洲之類。」
再拿著美國隊白色球衣查問。
「我唔係好熟喎．．．我估巴西啦．．．」
實情是，隊徽上有"US"字樣，另外就算不是球迷，巴西是招牌黃色球衣，也可能會記起。
記者再拿多張相片，部分是足球明星，另有一些是其他界別的名人。
結果，有人把NBA球星高比拜恩，認作足球員；另有一位哥哥，把英格蘭足總主席威廉王子，當作英格蘭世界盃大軍成員之一，他被糾正後還嬉皮笑臉說：「咁都係英格蘭啦！」
想不到，我當初的胡亂假設，全部言中。

若果是足球博士才有資格看足球，或許每個世界盃賽場，總會得小貓三、四隻。但有上述這些人參與足球，卻又真的把觀賞的質素和品味降低了。
節目中訪問了一位場場落注，卻鮮有睇波的男子，以及一名「腦筍」看似尚未癒合，打正旗號為「睇波都係為睇靚仔」的波經節目女主持。看到他倆對足球的態度和咀臉，實在覺得，這些人令足球比賽變質、污染。